Nava Castro destaca que, en apenas tres anos de goberno, Ponteareas está a recuperar o tempo perdido con investimentos, novos equipamentos e servizos públicos ao servizo das familias.
Ponteareas conta cunha nova Ludoteca Municipal Pública, «#Ludotea», un proxecto que xa é realidade e que simboliza unha forma de gobernar baseada nos feitos, no compromiso e na capacidade de xestión.
O grupo municipal do Partido Popular, coa alcaldesa e presidenta Nava Castro Domínguez á fronte, continúa cumprindo os compromisos adquiridos coa cidadanía e demostrando que Ponteareas pode avanzar cando existe un proxecto de municipio, liderado político e vontade de transformar as cousas.
En apenas tres anos, o actual executivo municipal está a impulsar unha nova etapa para Ponteareas, deixando atrás anos nos que moitos proxectos quedaron pendentes e nos que as necesidades da veciñanza non recibiron a resposta que merecían. Hoxe, fronte á política dos anuncios e das promesas, o PP de Ponteareas aposta pola xestión, polos investimentos e por converter os compromisos en realidades.
«#Ludotea» é un exemplo desta maneira de gobernar: unha nova infraestrutura pública pensada para os nenos e nenas, para as familias e para construír un municipio que ofrece máis oportunidades e mellores servizos. Porque investir na infancia e nas familias é investir directamente no futuro de Ponteareas.
A alcaldesa, Nava Castro, pon en valor tamén a colaboración institucional que fixo posible esta actuación, agradecendo o apoio da Deputación de Pontevedra e o compromiso do seu presidente, Luis López. Unha colaboración que evidencia a importancia de contar con institucións aliadas que non se limitan ás palabras, senón que respaldan os concellos con investimentos e feitos concretos.
Desde o Partido Popular de Ponteareas subliñan que esta inauguración representa moito máis ca a apertura dunha nova instalación: é a demostración de que Ponteareas está en marcha, de que hai un equipo de goberno que traballa cun rumbo definido e de que os compromisos electorais se poden transformar en melloras reais para a cidadanía.
Fronte ao inmobilismo do pasado, xestión no presente e futuro para Ponteareas. Ese é o compromiso do Partido Popular e do Goberno de Nava Castro: seguir traballando, seguir investindo e seguir transformando o municipio para que a veciñanza teña os servizos e as oportunidades que merece.
Porque gobernar é cumprir. E Ponteareas está a avanzar.
