Ponteareas, 1 de decembro de 2025.– O novo goberno municipal de Ponteareas, encabezado pola alcaldesa Nava Castro Domínguez, está a demostrar con feitos que unha forma diferente de gobernar é posible, baseada na planificación, o compromiso e a responsabilidade na xestión dos recursos públicos.
Tras oito anos de abandono por parte do bipartito BNG–PSOE, o estado das beirarrúas do centro urbano é crítico. Porén, esta situación comeza agora a revertirse grazas ás actuacións que está a impulsar o actual executivo municipal. As obras en marcha, financiadas con fondos propios, poñen de manifesto a vontade firme de recuperar o tempo perdido e devolverlle á cidadanía unha vila á altura do que merece.
Primeiras actuacións na avenida Castelao
Os traballos que se están a desenvolver na avenida Castelao constitúen o primeiro paso dun plan máis amplo orientado a corrixir a falta de mantemento e as intervencións deficientes herdadas do anterior goberno.
A alcaldesa Nava Castro subliñou:
“Estamos a poñer orde, recuperando espazos deteriorados e creando unha Ponteareas accesible, segura e preparada para o futuro”.
Intervencións prioritarias por motivos de seguridade
A prioridade do goberno local céntrase nos puntos máis degradados ou perigosos, especialmente nas zonas onde o levantamento das plaquetas supón un risco para peóns e persoas con mobilidade reducida. O executivo aposta por proxectos elaborados con criterios técnicos, visión a medio prazo e planificación rigorosa, evitando improvisacións e erros que durante anos penalizaron á cidadanía.
Críticas infundadas e falta de acción do anterior goberno
Dende o actual equipo de goberno lémbrase que resulta incomprensible que o BNG cuestione agora estas actuacións cando, durante o seu mandato, tiveron ocasión de arranxar as beirarrúas e non o fixeron, optando en cambio por destinar máis de 50.000 euros a debuxos e marcaxes no centro do municipio.
Un compromiso a longo prazo coa recuperación da vila
Dende o Partido Popular recoñécese que aínda queda moito por facer, dado o elevado número de demandas veciñais que permanecían sen resposta. Por iso, o goberno municipal continuará traballando con rigor, planificación e responsabilidade para recuperar Ponteareas e situar a vila no lugar que merece.
