Ponteareas, 31 de outubro de 2025.– A concelleira popular Silvia Fdez. Táboas informa de que a Consellería de Vivenda e Planificación de Infraestruturas da Xunta de Galicia vén de notificar ao Goberno de Ponteareas a aprobación definitiva da modificación puntual número 1 do Plan Xeral de Ordenación Municipal (PXOM).
Táboas destacou que se trata dun importante fito na xestión municipal, “ao conseguir a primeira modificación do PXOM de Ponteareas. Hai anos que poderiamos ter un novo centro de saúde se o Plan Xeral contemplase solo dotacional, pero o planeamento aprobado no 2021 non cumpría as expectativas inmediatas nin futuras da veciñanza”.
Para desbloquear esta situación, o actual Goberno municipal que lidera Nava Castro, promoveu unha modificación puntual que permite dotar ao municipio dun terreo axeitado para o novo centro de saúde, dado que “no PXOM aprobado polo anterior goberno de esquerdas non existía ningunha reserva de solo coas características que esixía a Xunta para un edificio de 5.000 m²”, explicou a edil.
“O PXOM é un documento vivo, que debe evolucionar coas necesidades reais de Ponteareas. Esta modificación é un exemplo de como se pode avanzar con rigor técnico, planificación e vontade política”, subliña Táboas.
Un paso decisivo cara ao novo centro de saúde
A aprobación definitiva desta modificación supón un avance determinante para que o novo centro de saúde de Ponteareas sexa unha realidade no menor tempo posible. A concelleira de Urbanismo destacou que “con xestión diaria e traballo rigoroso pódense sacar adiante proxectos tan relevantes como este”.
Grazas a esta modificación, a Xunta de Galicia construirá o novo centro sanitario nunha parcela de 5.713 m² situada en solo urbano consolidado, o que facilitará a súa execución.
Previsión orzamentaria
A alcaldesa Nava Castro adiantou que o orzamento municipal para 2026 incluirá unha partida de 600.000 euros para a redacción do proxecto.
O novo centro de saúde substituirá ao actual, que conta con máis de 35 anos de antigüidade e non dispón de espazo suficiente para novos servizos. A intención do Goberno local é que as novas instalacións amplíen as áreas asistenciais e melloren a calidade do servizo sanitario.
Distribución e servizos previstos
O novo centro contará con:
- 9 consultas de medicina de familia,
- 11 consultas de enfermería,
- 2 novas consultas de docencia (MIR e EIR),
- 1 consulta de farmacia,
- 2 consultas de saúde bucodental,
- área de fisioterapia con ximnasio,
- 4 salas polivalentes,
- zona de radiodiagnóstico,
- 2 consultas de matrona,
- unha consulta para pacientes infecciosos,
- e sala de educación sanitaria.
Na área pediátrica haberá 2 consultas de pediatría, 2 de enfermería pediátrica, unha sala de observación e tratamento e outra para pacientes respiratorios.
O PAC contará con 3 consultas médicas, 3 de enfermería, sala de reanimación, 2 de observación, 8 dormitorios e 2 novos vestiarios. Ademais, o centro acollerá unha base do 061 con dormitorios e sala de estar.
A Unidade de Saúde Mental disporá de 2 consultas de psiquiatría, 1 de psicoloxía clínica, 1 de enfermería, 1 de traballo social, 1 de docencia e unha sala de actividades grupais, ademais de 4 novas consultas médicas especializadas.
Ampliación do persoal sanitario
O novo centro implicará tamén un incremento do cadro de profesionais:
- 15 médicos de familia,
- 3 pediatras,
- 1 farmacéutico,
- 15 enfermeiros,
- 3 TCAE,
- 8 profesionais de servizos xerais,
- 2 odontólogos,
- 1 MIR, 1 EIR,
- 3 matronas, 3 fisioterapeutas,
- 1 traballador social e 2 hixienistas.
O PAC contará con 9 médicos e 9 enfermeiros, e a Unidade de Saúde Mental con 2 psiquiatras, 1 psicólogo, 1 enfermeira especialista, 1 traballador social e 1 persoal de servizos xerais.
Unha aposta polo futuro da sanidade en Ponteareas
Con esta actuación, o Goberno de Ponteareas e a Xunta de Galicia avanzan conxuntamente para mellorar a atención sanitaria da comarca, ofrecendo unhas instalacións modernas e adaptadas ás necesidades de máis de 40.000 persoas da área de influencia.
Ponteareas con feitos.
